Sholat Sunnat Idul Fitri
IEDUL FITRI
—————————
Imam Nawawi nguningakeun :Kecap ied (عيد) tina asal kecap a'ud (عود)nu pihartosenana mulang atanapi balik deui ,disebat kitu kumargi berulang ulang .
( Al Majmu Syarah Muhadzab ;5/3)
HUKUM SHOLAT IED
Saur Imam Abu ishaq asy syiroji numutkeun madzhab Imam Syafii sholat ied hukumna sunat.
Namung numutekun Imam Abu Said Al istikhori ,sholat ied hukumna fardlu kifayah .
Ari dalil madzhab Imam Syafii anu nganyatakeun sholat ied teh hukumna sunat,eta hadits anu sumberna ti Tholhah bin Ubaidillah rodliallohu 'anhu :
اَنَّ رَجُلًا جَاءَ اِلَى رَسُوْل اللّٰه صَلَى اْللّٰهُ عَلَيْه وَسَلَم يَسْاَلُ عَنْ الاِسْلَامِ فَقَالَ خَمْسُ صَلَوَاتٍ كَتَبَهُنَّ اللّٰهُ عَلَى عِبَادِهِ فَقَالَ :هَلْ عَلَيَّ غَيْرُهَا ،قَالَ لَا اِلَْا اِنْ تَطَوَّعَ
" Saestuna hiji jalmi sumping ka Rosululloh shollallohu alaihi wa sallam naroskeun ngenaan islam ka Anjeuna,atuh pok Rosululloh ngadawuh :
" (Islam teh ) eta sholat lima waktos anu tos diwajibkeun ku Alloh ka hamba - hambaNa”.
Pok deui eta jalmi naros :" Naha aya nu wajib deui ka abdi anu sanesna ? ''
Pok Rosululloh ngawaler :" Teu aya ,kecuali mun hidep bade midamel pasunatan "
(HR Imam Malik,Imam Syafii sareng Imam Bukhori )
Pami ngabandungan pendapat Imam Abu Said Al Istikhori ,maka saupami penduduk hiji daerah sepakat heunteu ngalaksanakeun sholat ied ,maka (pamarentah )wajib merangan eta penduduk.
Sedeng numutkeun madzhab Imam Syafii, saupami penduduk hiji daerah sepakat heunteu ngalaksanakeun sholat ied ,maka kabagi kana dua pendapat :
1) Teu tiasa diperangan ,margi sholat Ied teh sunat,sakumaha ilaharna sholat sunat sanesna.
2) Kedah diperangan ,margi sholat ied teh kalebet syiar syiar islam ,atuh ngantunkeunana eta ngaremehkeun kana syara',benten sareng sholat sunat sejena ,da ari sholat sunat sejen mah tiasa dilakonan bari nyalira ,atuh ngantunkeunana moal katembong sapertos katembongna ngantunkeun sholat ied.
Salajeungna sholat ied teh sholat anu ditangtoskeun waktosna tur teu disyareatkeun qomat ,atuh numutkeun syareat teu kedah qomat ,sami siga sholat dluha .
( Al Majmu Syarah Muhadzab :5/ 3)
Imam Nawawi rohimahulloh nambihan sababaraha penjelasan cariosan Imam Abu Ishaq di luhur:
1) Ijmak sadaya kaum muslimin kana disyareatkeunana sholat ied.
2) Anapon hukumna,numutkeun madzhab Imam Hanafi Imam Maliki,Imam Syaii ,Imam Daud sareng jumhur ulama eta sunat muakkad.
Namung numutkun sapalih ash hab Imam Hamafi fardlu kifayah.
Anapon numutkeun Imam Hanbali aya dua riwayat ( sunat sareng fardlu kifayah).
( Al Majmu Syarah Muhadzab :5/4).
WAKTOS SHOLAT IED
Awal watos sholat ied numutkeun Imam Abu Ishaq Asy syiroji ,Imam Arruyani sareng anu sanesna ,eta ti kawit bijil panon poe ,mung afdlolna ditangguhkeun dugika panon poe naek saukuran sa tumbak.
Sedeng numutkeun Imam Al Bandaniji ,Imam Shoidalani,Imam Al Bagowi sareng anu sanesna ,awal waktos sholat ied ti kawit panon poe tos naek saukuran satumbak.
Anapon ahir waktos sholat ied mah sadaya ash hab Imam Syafii sepakat eta dugi ka lingsir panon poe ( lohor).
Nash Imam Syafii sareng ash habna oge sepakat,rehna sholat iedul adlha sunnatna dilakonan kalayan saenggalna ( enjing keneh ) sedeng ngalakonan sholat iedul fitri mah sunnat ditangguhkeun teu enjing teuing.
Slajengna saupami hiji jalmi teu tiasa ngalakonan sholat ied berjaaah sareng imam,maka sholat ied nyalira (munfarid),oge sholatna kalebet 'Ada ( ngalakonan dina waktosna) salami teu acan kabujeng lingsir panon poe (lohor) dinteunan ied.
Anapon kango anu teu acan ngalaksanakeunana heg kabujeng lohor,maka numutkeun sapalih para ulama sunat diqodloan.
Namung numutkeun Imam Hanafi ,saupami kakantun ngalaksanakeunana berjamaah sareng imam ,maka sama sakali teu kedah ngalaksanakeun sholat ied.
TEMPAT SHOLAT IED.
Netepan sholat ied tiasa di masjid atanapi di musholla (di lapang anu lega ).
Anapon tempat anu utami kango sholat ied ,para ulama kabagi kana dua pendapat :
1) Anu utami sholat ied di musholla (di lapang ) saupami masjidna alit.
Hal ieu dumasar hadits:
اَنَّ النَّبِيَّ صَلَى اْللّٰهُ عَلَيْه وَسَلَم كَانَ يَخْرُجُ اِلَى المُصَلَّى
" Saestuna Kangjeng Nabi sok ngajugjug ka musholla /lapang (tiap tiap sholat ied )"
(HR Imam Bukhori sareng Imam Muslim ).
Kanjeung Nabi kitu teh sabab dina sholat ied jalmina seeur(atuh moal ka tampung di masjid)
Atuh saupami masjidna lega ,maka anu langkung utami sholat ied teh di masjid.Lantaran para imam (pamingpin kaum muslimin ) salamina sok netepan ied di Mekkah di lebet masjid.
Di sagigiren eta lantaran ari masjid mah tempatna langkung mulya tur langkung beresih.
Saur Imam Syafii ,saupami masjid lega ,namung kalah sholat ied di lapang ,maka eta teu nanaon.Mung saupami masjid sempit(alit) teras sholat ied didinya heunteu di lapang ,maka kuring mah mikangewa /makruh.
2) Numutkeun pendapat nu pang sohihna ti sagolongan ulama khurosan ,anu langkung utami sholat ied di lakukeun di musholla (lapang ) .Lantaran Kangjeung Nabi ngabiasakeun ngalaksanakeunana di lapang.
Kecuali Pami aya uzdur sapertos hujan,tiris atanapi aya kasieun,maka di masjid .
Anapon kango jalmi anu aya di Mekkah ,maka teu aya perbedaan pendapat di kalangan para ulama bahwa anu langkung utami ngalaksanakeun sholat ied teh di Masjidil Harom.
( Al Majmu Syarah Muhadzab :5/6)
✍🏻 Asep Lugeza ( Santri yayasan Imam Syafii)